بالرَغم من الصُعوبات في الحَياة، مش لازم نِفقد الأمل

سمِعِت قِصَص كتير عن ناس حَققَّوا نجاحات في حَياتهم بعد ما كانوا يعانوا سواء من الفَقر، البَطالة، الإعاقة أو المرض، الحِرمان من أساسِيات الحَياة، العُنف، أو تَحَدِيات أخرى مُمكِن تكون سِياسِية أو اجتِماعية. ما كانش عندهم أَمل أنو يتمَكَنوا من التغلب على هاي الصُعوبات، أو فَقدوا الأمل نهائِيا وبعدين ما استمروا بالنضال حتى يِصلوا للنجاح. لأن مِش دايماً كل الناس بِتحَمَلوا الضُغوطات بسبب الظروف الصَعبة. في هاي الحالة، بضطَّروا يوَقفوا عن العمل في مَسار النجاح عشان يِشتغلوا بأي مجال حتى يلاقوا حَل للظروف الصَّعبة اللي عايشين فيها. مثلا إذا كانت الصُعوبات مالية، لازم الإنسان يشتغل عشان ما يِقَع في الديون. وكمان تَحقيق النَّجاح هو مُهِمَة مش سهلة بتِطلب كتير جُهود، وقت، مُثابرة و صَبر. وإلا النجاح مِش مُمكن ولازم نتذكر ونتوقع بأن طَريق النجاح مش مُستقيم ومليان مُعيقات وعَراقيل لازم نتغلب عليها.

الإستِسلام في بداية أو وسط الطريق، هو نُقطة الضَعف اللّي كتير من الناس بِعانوا مِنها، هاد نتيجة عَدم الثقة بالنفس والقُدرات الذاتية. الإنسان لازم يثق إنو عندوا قُدرات سواء بَدَنية أو عَقلية بتساعد على تحقيق النجاح. هاي القُدرات بتطلب تَطوير وتَعزيز وأحياناً تَدريب حسب طبيعة مَجال النجاح. الإستِسلام بكون نتيجة الإحباط اللّي بتسبِبوا الظُروف المُحيطة وعَدم التشجيع. على سبيل المِثال، إذا كانت الظُروف الإجتماعية صَعبة نتيجة الافتِقار لمُقومات وعناصر النَجاح بكون الوضع بِحاجة لتحفيز، وهاد التحفيز (أو المُحفزات) لازم الشخص يبحث عنو (عنها) أو يخلِقها في البيئة اللّي عايش فيها. كَمان في إحباط نتيجة المُجتمع المُحيط، يعني مثلا في كتير ناس بيحبِطوا بعض بطرق مُختلفة زي 1- التقليل من شَأن الانسان زي الاستِهزاء بالقُدرات اللّي مُمكن يترك آثار نَفسية صَعبة على الإنسان ويؤدي إلى الفشل وتدمير الثِقة بالقُدرات الشخصية. 2- مُحاولة وَضِع العَراقيل، في ناس إذا بعرفوا إنك بتحاول تكون ناجح في مَجالك أو تحَقق نَجاح مُعَين، بعملوا خُطَط خَبيثة عَشان يسبِبولَك مَشاكل مُمكن تكون معقَدة تِمنَع النجاح بشكل دائِم. علشان هيك أنا بَنصح إِنو الإِنسان ما يحكي لأَي حَد عن الخُطَط المُستقبَلِية باستثناء الأصدِقاء المَوثُوق فيهم (اللي بيثق فيهم).

هاي قاعِدة مَعروفة في عِلم التنمية البَشَرية إنو "الإِنسان مش دايماً لازم يِكشِف عن أَسرار النَجاح الخاصة أو الخُطَط المُتبَعة لِتَحقيق النَجاح." تطبيق هاي القاعدة بِتطلب ذَكاء حاد خُصوصاً في المُجتمَعات اللّي فيها الناس بتِعرِف بعضها كتير بحيث إِنو العَلاقات الإِجتماعية قَوية. وهاد العامل مُمكِن يأَثر سَلبياً إِذا كان مَسار (مجال) النجاح بِتطلب مُخالطة الناس كتير. وهناك مَشاكل اجتماعية مَعروفة ب"الغَيرة و الحَسد." في هاد الحال، الإِنسان مُمكِن يلتقي بأصدِقاء أو زُمَلاء ما بِحِبوا الخير والسَعاد لغيرهم، بِفضلوا الفَشَل والتَعاسة إلهم. ما في شَك إِنو البيئة اللّي بِكون فيها مَشاكل زي هيك بِتأَثر سَلبياً على النَجاح. الإِنسان لازِم يعرف كيف يتصرَف بذكاء مع المُجتَمع المُحيط خُصوصاً إِذا كانت الظُروف ما بتِسمَح للإِنسان إِنو ينتِقل لَبيئة مُحَفِزة أَو تَشجيعِيَة أَفضل.

مِن الأمثلة الواقِعيَة للنجاح في فلسطين، المُغني أو المُطرِب (محمد عساف)، قبل ما يِصل للنِجومية (يصير نَجِم) عانى كثير في بَلدو في قطاع غزة بسبب الحِصار وأكيد كان في تحدِيات اجتماعية. كان عِندو حِلم لما كان زغير إِنو يصير مُغني مَشهور. بدا مِشوار الغناء في المَدرسة، كان يشارك في احتفالات ومهرجانات مَدرسية أو مَحلية، كان يغني أُغنيات وَطَنية مع المُغني الفلسطيني (جمال النجار). التَجربة الغنائية في مَرحلة الطُفولة حَفَزَت محمد عساف إِنو يطَوِر هاي المَوهِبة وما استَسلم للصُعوبات حتى شارَك في برنامج (محبوب العربArab Idol ) في لبنان وحَصَل على لقب مَحبوب العرب. محمد عساف الآن هو مُطرِب شَعبي مَشهور مش بس في فلسطين لكن في كل العالم العَربي والإِسلامي.

نيك فيوتتش (Nick Vujicic) ولد عام 1982، شخص بلا أَطراف أَصلو صِربي هاجر مع عائِلتو من صربيا لأستراليا. في بداية حَياتو فقد الأمل وحاوَل ينتحر (الانتحار) وكمان أمو وأبو ما اتقبلوا عشان ما إلو إيدين ولا رجلين، لكن في النهاية اتقبلو! الأمر الواقع. لما كان نيك مُراهق (لما كان عُمرو سَبعطعشَر سنة) قَرأ مَقالة في الجَريدة عن زَلَمة عِندو إِعاقة وكيف اتمَكن من التغلب عليها وحَقق نَجاح. كانت هاي المَقالة نُقطة البِداية في مِشوار نَجاح نيك لأَن القصة أَلهَمَتو كتير. وانطلق إِلى مِشوار النجاح واليوم نيك واحد من أَشهر المُعاقين في العالم. مُتَحدِّث بارِع ومُلهِم للملايين ونَشَر كتب عن تَجرِبة نجاحه، وفي سنة 2012 اتزوج من بين مكسيكية وخلف اربعة : ولدين وبنتين توأم. لأن نيك ما استسلم سواء لنظرة المجتمع أو للضعف البدني اللي بعاني منو هو آمن بأن "القوة هي قوة العقل والروح مش دايما القوة الجسدية." نيك أثبَت للعالم إِنو "ذوي الإحتياجات الخاصة" بِقدروا يعملوا المَستحيل بالنسبة لكثير من الناس.

ستيفين هوكينغز (Steven Hawking) ولد عام 1942، عالِم فيزياء بريطاني، بِعاني من شلل حَركي حاد وبستخدم كُرسي مُتَحرك، هو أبرَز عُلماء الفيزياء النَظرية على مُستوى العالم. مُبدع وعَبقري في مجال الفيزياء الكَونية كَمان. أَصابو الإِحباط نتيجة الإِعاقة الحَركية الدائمة، ولكن أَصر على تحقيق النَجاح (أو شق طريق النجاح). اتغلب على صُعوبات كثير وحصل على شهادة الدُكتوراه من جامعة اكسفورد. اليوم ستيفين هو مُحاضِر مَشهور بِقَدم الدُروس للطلاب من خلال نِظام إلكتروني حاسوبي مَوصول بالكرسي المُتَحرك اللِّي بِستخدمو. ستيفين هوكينغز هو مُعارض سياسي لليَمين المُتَطرف وكان إِلو مُشارَكات ضد حرب فيتنام والحرب على العراق وَصَفها ب"جريمة حرب،" وكمان دعا إلى نَزِع السِّلاح النووي، وهو مُعارِض للسِّياسات الإسرائيلية اتجاه الفلسطينيين ودعا لمقاطعة اسرائيل اكاديمياً.

لينين مورينو (Lenin Moreno)، عانى من إِعاقة حَرَكية، بستخدم كرسي مُتحرك، هو سياسي إكوادوري (من اكوادور) من مَواليد 19 مارس من سنة 1953. شَغِلَ لينين فولتير مورينو مَنصِب مدير المركز الوطني للمعوقين من عام 2001 إلى عام 2004، شغل مَنصِب نائب رئيس الإكوادور للفترة من عام 2007 حتى 2017 حيث انتخب رئيسا للبلاد.

في كثير أمثلة أُخرى عن ناس حَققوا ابداعات بالرغم من التَّحدِّيات الصَّعبة، لأنهم آمنوا أنو الصُعود للقمة لا يأتي من فراغ أو بدون مشوار طويل من النضال. الخُطوة الأولى هي المُبادرة والنية السليمة والتخطيط الأمثَل للأهداف. الخُطوة الثانية، النظرة إلى الأمام إلى القمة وتجاهل الماضي وأخطاء الماضي.

النجاح قد يكون بشكل فردي بقوم فيه شخص واحد من خلال عمل فريد مُلهِم للعالم، أو بشكل جَماعي بقوم فيه مَجموعة من الأَشخاص زي فِرقة "ياني" الموسيقية "Yanni" (Yiannis Chryssomallis) من مواليد اليونان عام 1954 الفرقة حَقَّقت نجاحات مَلحوظة وباهِرة حول العالم وعلى مَنصات الأوركسترا العالمية.

لا تفقد الأمل! بغض النظر عن التَحدِّيات، اتذكر بأن رح يكون هناك اشي بينتظرك في درب النجاح، وهاد الإشي هو الدافعية والطاقة للإستمرار. بالنظرعلى الأمثلة السابقة بالإضافة لمئات ويمكن ألوف قصص النجاح الأخرى هي بحد ذاتها تعطي الأمل للإستمرار. لأنو هدول الناس اللِّي نَجحوا بحياتهم زينا ما أجو من كوكب ثاني (كَوكب المَريخ)، بالعكس لو نظرنا على الظروف اللِّي عاشوها يمكن بنلاقي أنو أصعب من ظروفنا.

لا تتردَّد! كَمِّل المِشوار! كون عِبرة أو نموذج يُحتذى به لكثير من الناس! هناك مين بيستنى يشوفك إنسان ناجِح علشان يكون فَخور فيك: جيرانك، اصحابك، قرايبَك، بلدك أو قريتك، وطنك أو العالم كلو، وما تهتم للحاقدين والغيورين!

معلم اللغة العربية لغير الناطقين بها: ناصر القاضي

Mr. Macron is luring Trump to go back to the Earth Agreement.

If can lift up bricks, don't raise up for others' help

Mr. Zuckerberg is facing a new phase in his facebook business 

vvvv

Cultivate the seeds of education wherever you go ... It comes out of an experience.